Ótrúlegt en satt! Forsetinn fimmtugur

með pakkannÞann 7. nóvember síðastliðinn varð forseti Íslandsfélagsins í Belgíu, Jónas Jóhannsson, fimmtugur og þótti félagsmönnum ástæða til að heiðra hann af því tilefni. Ákveðið var að slá tvær flugur í einu höggi og kenna honum að drekka gott kaffi enda Carrefour hryllingurinn honum ekki samboðinn. Keypt var eðalkaffivél og hún afhent við hátíðlega athöfn að lokinni fótboltaæfingu Bestham í Waterloo sunnudaginn 11. nóvember.

Það er auðvitað ótrúlegt að forsetinn skuli vera orðinn fimmtugur. Maðurinn hefur starfsþrek og útlit á við sér mun yngri mann. Sú er þetta skrifar telur að félagsstörfin haldi forsetanum ungum og hefur þá trú að það sé því ekki óhætt fyrir hann að hætta afskiptum af þeim. Áfram Jónas!

Stríð og friður: Haustferð Íslandsfélagsins 15. – 16. september 2012

Að þessu sinni var haustferð Íslandsfélagsins á stríðsslóðir við Ypres. Þátttakendur voru 36, þar af 12 börn á aldrinum 0-12 ára. Ferðin hófst á Hooge Crater safninu, sem er lítið einkasafn. Síðan var ekið til Tyne Cot sem er stærsti herkirkjugarður Breska samveldisins. Hann er afar bjartur og blómum prýddur og lítið skyggir á útsýnið þaðan. Legsteinarnir eru hvítir og öll stemning í nokkru ósamræmi við þær miklu hörmungar sem urðu til þess að allir þessir ungu menn létu lífið.

Eftir hádegisverð á aðaltorginu í Ypres skoðuðum við Yorkshire Trench Dugout svo og Essex Farm kirkjugarðinn þar sem er minnisvarði um John McCrae. Hann var kanadískur læknir og skáld og þekktur fyrir kvæðið In Flanders Field sem hann orti eftir að hafa misst vin sinn Alexis Helmer í orrustu við Ypres.

Sameiginlegur kvöldverður var á veitingastaðnum Pacific Island í Ypres og að honum loknum var haldið til Menin Gate. Þar hefur, síðan árið 1928, verið haldin minningarathöfn á hverju kvöldi um týnda hermenn þar sem blásið er í herlúðra (The Last Post).

Langemark

Sunnudagsmorguninn hófst á heimsókn í Flanders Field safnið sem er einstaklega áhrifamikið safn. Við undirleik þungrar og einhæfrar tónlistar er stríðshryllingnum dembt yfir gestina með myndum, leikþáttum, persónulegum munum hermanna og fleiru. Þetta er safn sem enginn ætti að láta fram hjá sér fara. Næsta stopp var Langemark, þar sem hátt í 45000 Þjóðverjar eru grafnir. Þar ríkti önnur stemning en í Tyne Cot. Há eikartré veita skjól og skugga, legsteinarnir eru úr dökkum stein og engin blóm á leiðunum. Það var ekki laust við að manni fyndist þetta passa betur tilefninu en fíneríið í Tyne Cot.

Sprengigígur við Hill 60

Eftir stopp við Hill 60 þar sem hópurinn gekk um gamlan vígvöll og snæddi hádegisverð var farið í síðasta kirkjugarð ferðarinnar, Railway Dugouts Burial Grounds, þar sem nokkrir Vestur-Íslendingar hvíla.

Þar lásu Nick Hannigan og Árni Snævarr ljóðin In Flanders Field eftir John McCrae og Grass eftir Carl Sandburg í þýðingu Magnúsar Ásgeirssonar. Þetta var viðeigandi endir á frábærri ferð.

Það var slegið á ýmsa tilfinningastrengi í haustferðinni að þessu sinni. Heimsóknir í kirkjugarða og vígvelli og á hið stórkostlega safn In Flanders Fields Museum í Ypres, svo og hugleiðingar um brjálsemina sem felst í að senda alla þessa ungu menn á vígvellina vöktu upp trega og depurð. En skemmtilegur félagsskapur og dásamlegt veður voru gott mótvægi og allir fóru glaðir heim. Það er óhætt að mæla með ferð á stríðsslóðir við Ypres. Ekki þó í regni og dumbungi; það yrði ábyggilega of þunglyndislegt.

Matthías G. Pálsson var frábær leiðsögumaður og var klyfjaður lesefni og fróðleik. Enn og aftur sannaði Jónas forseti sig sem ferðafrömuður og skipuleggjandi. Þeim eru færðar bestu þakkir svo og öllum þeim sem tóku þátt í þessari skemmtilegu ferð.

Íslandsfélagið vill að lokum mæla sérstaklega með Main Street Hotel í Ypres. Einungis 3 stjörnur en það er ekki á hverjum degi sem maður fær kampavín og foie gras í morgunverð!

Hátíðarhöld 17. júní 2012

Sunnudaginn 17. júní sl. stóð Íslandsfélagið fyrir þjóðhátíðarsamkundu við skandinavíska skólann í Waterloo. Dagskráin var með hefðbundnum hætti og hófst með kvennahlaupi (sjá frétt á heimasíðunni).

Síðan tók við grillveisla og auðvitað var boðið upp á SS pylsur og Myllubrauð svo og drykkjarföng af ýmsum toga. 

Formlegri dagskrá lauk með ávarpi fjallkonunnar, sem að þessu sinni var Björk Óskarsdóttir, og fjöldasöng.

Hátíðin var vel sótt og líklega voru um 80 mættir þegar flest var, bæði nýir félagar og eldri svo og gestir í heimsókn frá Íslandi.  

Þótt það megi furðu sæta, miðað við það sem af er sumri í Belgíu, léku veðurguðirnir við okkur og það kom ekki dropi úr lofti!

Golfmót Íslandsfélagsins í Belgíu „Æsland Ópen” 2012

Sunnudaginn 10. júní fór fram hið árlega golfmót Íslandsfélagsins, „Æsland Ópen”, sem nú var haldið þriðja sinni og fór fram á velli Overijse Golf Club, Gemslaan 55 3090 Overijse. Mótið hófst kl. 13, í blíðskaparveðri og voru 16 kylfingar skráðir til leiks, þar af fimm „útlendingar” sem komu ofan af Fróni til þess eins að keppa um gullið. Leiknar voru níu 9 holur samkvæmt „Texas Scramble” fyrirkomulaginu, en þá spila tveir og tveir saman, slá betri bolta síns teymis og halda sameiginlegt skor. Gafst þannig óvönum kylfingum á borð við Einar Símonarson tækifæri til að spila með sér reyndari mönnum og hafa gagn og gaman af.

Veitt voru verðlaun fyrir þrjú efstu sætin, auk þess sem best klæddi kylfingurinn var leystur út með veglegri gjöf, sem og sá kylfingur sem átti besta nándarhöggið á áttundu holu. Er skemmst frá því að segja, að Jón Óskar Sólnes og Einar Símonarson hrepptu gullið, silfrið rann til Guðlaugs Bergmundssonar og sonar hans Kára, en Gunnar Geirsson og Gestur Ásólfsson urðu að láta sér bronsið nægja. Dalastúlkan Katrín Magnúsdóttir var valin best klæddi kylfingurinn og hafnfirðingurinn Eiríkur Þorvarðarson hreppti nándarverðlaunin með frábæru upphafshöggi á áttundu holu, en samkvæmt mælingu Jónasar Jóhannssonar eftirlitsdómara nam kúludruslan staðar aðeins 15,31 metrum frá holukjafti.

Mótstjóri var Guðlaugur Bergmundsson og veitti hann verðlaun við hátíðlega athöfn að móti loknu. Til stóð að afhenda gullverðlaunahöfunum nýjan og stórglæsilegan farandbikar Íslandsfélagsins, en þegar á reyndi kom í ljós að þeir höfðu ekið á brott í sigurvímu og fengu því dolluna boðsenda daginn eftir. Í refsiskyni ákvað hinn skeleggi mótstjóri, að undirlagi frú Katrínar Magnúsdóttur, að svipta drengina öðrum tveggja gullpeninga og var hann þess í stað afhentur Gabríelu Markúsdóttur, sem þótti standa sig einkar vel á sínu fyrsta golfmóti, en þess má og geta að hún er barnabarn frú Katrínar.

Kvennahlaup 17. júní

Hið árlega Sjóvár kvennahlaup ÍSÍ var haldið í blíðskaparveðri þann 17. júní við skandinavíska skólann í Waterloo. Að lokinni örstuttri upphitun var sprett úr spori og var talsverður keppnisandi í fólki. Þátttakendur voru um 40; konur, karlar og börn á öllum aldri. Flestir þeirra eru Belgíubúar en einnig hlupu gestkomandi með. Sprettharðastur reyndist unglingur í sumarfríi frá Íslandi en við tölum ekki meira um það því í svona hlaupi sigra allir sem taka þátt.

Vorferð 2012: Champagne og kampavín

Vorferð Íslandsfélagsins 2012 var farin fyrstu helgina í júní og var áfangastaðurinn kampavínshéraðið í Frakklandi, eða Champagne. Hátt í 40 manns óku sem leið lá frá Brussel og hittust á búi Nowack hjónanna, í Vandières, laugardaginn 2. júní. Þar var snæddur ljúffengur hádegisverður. Með kampavíni!

Síðan var haldið var til bræðranna David og Hervé Gaudinat í Festigny. Þeir buðu hópnum upp á skoðunarferð um vínkjallarann og skemmtilegan fróðleik um framleiðslu kampavíns. Loks var smakkað á guðaveigunum, sem var auðvitað það sem allir höfðu beðið eftir.

Eftir stutt dagskrárhlé var haldið í kampavínssmökkun hjá Nowack fjölskyldunni, sem hefur framleitt kampavín síðan seint á 18. öld. Að smökkun lokinni var undirbúin sameiginleg grillveisla hópsins. Veðrið lék við ferðafólkið þennan dásamlega dag og það var fallegt að sitja í myrkrinu og raula undir gítarleik Frank Sands seint um kvöldin. Veigarnar voru heldur ekki af verri endanum því vitaskuld var drukkið kampavín með tjaldbúðasöngnum.

Það var almenn ánægja með vorferðina enda umhverfið dásamlegt, drykkurinn góður, og hópurinn samstilltur. Nowack hjónin bjóða upp á frábæra aðstöðu fyrir ferðafólk og fallegt tjaldstæði og er óhætt að mæla með þessum stað sem bækistöð fyrir kampavínssmökkunarfrí. Til að þakka fyrir sig studdu meðlimir Íslandsfélagsins dyggilega við bakið á kampavínsframleiðendum með því að fylla bílana af góðu kampavíni.

Í kampavínshéraðinu er margt að sjá og margir gerðu sér ferð til Reims á leiðinni heim til að berja augunum hina stórbrotnu dómkirkju sem þar er.

Ekki má gleyma að þakka forseta Íslandsfélagsins frábæra skipulagningu ferðarinnar en hann bar hitann og þungann af henni.

Skúmaskot Brussel – pöbbarölt

Stjórn Íslandsfélagsins þakkar þeim sem þátt tóku í ferðinni „skúmaskot Brussel” laugardaginn 5. maí fyrir frábæra skemmtun. Þátttakendur voru 14, bæði konur og karlar, og það er mál manna að afar vel hafi til tekist. Þátttakendur gengu sér til hita í napurlegu veðrinu, drukku hóflega og sýndu prúðmennsku í alla staði.

Þetta var sannkölluð menningarferð; heimsóttir voru sögulegir barir og fræðst um sögu þeirra og drukknir bjórar af ýmsum gerðum. Einnig var skoðuð listsýning (sjá mynd). Jóni Óskari Sólnes eru færðar sérstakar þakkir fyrir frábæra skipulagningu og fararstjórn. Við vonum að framhald verði á ferðum af þessum toga.

Dagskrá Íslandsfélagsins

Félagsmönnum ætti ekki að leiðast því nóg er að gera á næstunni. Skráið strax í dagbækurnar, tölvurnar og símana það sem þið hafið áhuga á að taka þátt í.

  1. Laugardagurinn 2. júní – Vorferð til Champagne í Frakklandi. Skoðunarferð á vínbúgarð(a) / barnapössun/ gisting á staðnum / grill og kvöldvaka (skráning er hafin).
  2. Sunnudagurinn 10. júní – Hið árlega golfmót félagsins „Æsland Ópen” (sjá auglýsingu á fésbók undir viðburðir). Mótsskráning auglýst fljótlega. Hámarksfjöldi: 20 kylfingar
  3. Laugardagurinn 16. júní – Landsleikur Hollands og Íslands í undankeppni HM 2013 í handknattleik (sjá auglýsingu á fésbók).
  4. Sunnudagurinn 17. júní – Hin árlegu 17. júní hátíðahöld á lóð skandinavíska skólans í Waterloo. Kvennahlaup / fjallakonan / íslensk grillveisla / leikir (nánar auglýst síðar). Skráning er hafin í hlaupið (sjá heimasíður og fésbók).

Atburðir hausts og vetrar 2012 sem þegar hafa verið ákveðnir eru þessir:

  1. September eða október: Dagsferð á stríðsminjasvæði í Ypre undir fararstjórn Matthíasar Pálssonar og Jóns Óskars Sólnes.
  2. Október: Hin árlega eplatínslufeð
  3. Sunnudagurinn 9. desember – Hið árlega jólaball í húsnæði EFTA, frá kl. 15-17.
  4. Föstudagurinn 8. febrúar – Hið árlega þorrablót félagsins, haldið á sama stað og undanfarin ár, en nú á mun lægra verði en áður!

Place Lúx samkomur verða svo áfram á sínum stað.

Stjórnin

Jólaball Íslandsfélagsins sunnudaginn 11. desember

Stjórn Íslandsfélagsins minnir á árlegt jólaball félagsins sem verður haldið sunnudaginn 11. desember 2011 klukkan 15.

Ballið verður haldið í húsakynnum EFTA, Rue Joseph II, 12-16, B-1000. Sem fyrr eru foreldrar eru beðnir um að koma með pakka merkta sínu barni/börnum.

Einnig eru foreldrar góðfúslega beðnir um að koma með eitthvað til að narta í (köku, kex, ávexti, osta) sem fer á veisluborðið. Íslandsfélagið bíður uppá drykki með herlegheitunum.

Stjórn Íslandsfélagsins